Kasım ayın 7-dä Gagauz Erin başkanı, Mihail Formuzal kendi 53-ncü yaşını tamannadı.
Nicä da herbir yıl, onu kutladı diil sade Bakannık komitetin azaları, ama Moldovanın politikleri da. Kutlamak telegramalarını, başkanın pres-slujbasına görä, yolladılar Pridnestrovyenın başı Evgeniy Şevçuk, büükkelçilär hem başkası.
Ama ne en meraklı, ayırılmış Gagauziya Halk Topluşun başı Dmitriy Konstantinov da kaçırmadı kolayını başkanı kutlamaa. Komrat kasabasının bir televizionun reportajına görä, oldu bu iş pek interesli.
Dmitriy Konstantinov, Demyan Karaseni hem taa birkaç yakın Dudogluya insan, geldilär başkanın kabinetinä, da kameralara dooru sırıdarak, kutladılar Formuzalı duuma gününnän. Konstantinov okadar bol kendini götürärdi, ani yabancı bir insan annayamayaceydı, neredä Gagauziyanın seçilmiş başı, neredä da avtonomiyanın ikinci adamı (GHT spikerı).
«Büündän ötää dooru cenkleri brakêrız bir tarafa!», – dedi Konstantinov, sırıdarak kameralara dooru, vereräk annamaa, ki Formuzala bu kabinettä bulunmaa aaz kaldı. Etiştirämedilär taa bir bişey faydalı yapmaa, ama başkanı artık gülmää aldılar!
Bana kalsa, Formuzal osaat annadı neresi-ne, da biraz sıkıldı. Onun üzündän belliydi, ki Konstantinov-Dudoglu tandemı sevindirmedi onu.
410
