|
| İrina VLAH kutladı Gagauziyanın yaşayannarını «Ana dilimiz» yortusunnan |
 |
08:37; 27 04 2017 |
 |
0 |
 |
1 784 |
|
Gagauziya Başkanı İrina VLAH kutladı avtonomiyanın yaşayannarını «Ana dilimiz» yortusunnan, angısı baalı Ay Boba Mihail Çakirin duuma günününän.
Başkan laflarına görä, Mihail Çakir ‒ gagauzlara deyni bir legenda adamı. O çevirdi Bibliyayı gagauz dilinä, verdi kolaylık insana klisedä gagauzça Allaha dua etsin. Çakir çıkardı ilk gagauz dilindä gazetayı. Adı ‒ «Hakikatın sesi». Ozaman, açan çoyu hiç bilmääzdi yazmaa hem okumaa, Ay Boba Mihail Çakir başladı kaldırmaa gagauzların arasında bilgiyi.
Büün Gagauziyanın 43 okulunda gagauz dilini üürener 12 338 kişi. Ana dilimizi okuyêr 115 üüredici. Taa çoyunda üüsek didaktika kategoriyası var.
«2016-nci yılda Gagauziyada kabledildi eni üüretmäk kanonu. Bu kanon verer kolaylık yavaş-yavaş gagauz dilinä geçirmää birkaç predmet. Sayêrım, ani bu iş lääzım olsun yakın vakıtlarda», - söledi İrina VLAH.
Başkan ekledi, ki Gagauziyanın Bakannık Komiteti adım-adım ilerleder ana dilimizi. İki yıl geeri Bilim-Aaraştırma Merkezindä gagauz dilindä kurslar başladı. Studentlär, büük yaşta insannar büük havezlän başarêrlar bu kursları.
Geçtii yıl Gagauziyada tipardan çıktı 3670 eni kiyat gagauz dilindä. Eni yaşamak gördü Nikolay Baboglunun, Gavril Gaydarcının, Todur Marinoglunun, Mina Kösenin yaratmaları. Onnar tiparlandı 34 bin ekzemplärda.
Geçtii yıl seftä 6500 uşak, birincidän dördüncü klasa kadar, gagauz dilindä günnükleri kabletti. Tiparlandı «Çöşmecik» kiyadı birinci klaslara deyni hem «Gagauz halkın kulturası hem adetleri» üçüncü klaslara deyni. İlk sefer Gagauziyada gagauz dilindä diktant geçti. Dokuz kişi premiya kabletti.
«Bu yıl tamannanêr 60 yıl, nicä gagauz yazısı ofițial uurunda kabledildi. Sayêrım, ani gagauz halkı kısmetli, çünkü onun var kendi avtonomiyası, dili, literaturası, kulturası. Gözäl, talantlı hem çalışkan insannarı. Biz hepsimiz lääzım taa çok çalışalım, ki Gagauziya ilerlesin! Kutlêêrım hepsinizi Ana dilimizin yortusunnan!», - danıştı gagauz halkına İrina VLAH.
Подписывайтесь на наши новостные ленты в социальных сетях - в facebook, одноклассниках, вконтакте, twitter и instagram
Читайте также по этой теме:
|
|
|
|
|
|
Топовые новости
|
|
|
|
Комментировать статьи на сайте возможно только в течении 5 дней со дня публикации.
|
410
